I. Patujolo
Patujolo tadok ma mauliate di asi ni roha ni Debata di panjouon dohot panogunoguonNa di huria Pandan on. Ndang ulaon na mura ulaon hasasahat ni barita Nauli i tu luat on, godang angka parungkilon na binolus huria on na ro sian duru dohot sian bagasan alai laos godang do boi putihanta mutiha na arga sian angka ragam ni namasa i.
Ruas ni huria on ndang adong penduduk asli angka pegawai negeri dohot pengusaha na ro sian luat na asing gabe tinggal di Pandan on, hombar tusi ma rumang hajongjongan ni Gereja dohot ngolu parhuriaon. Alai marhite Barita Nauli i dipasada di tonga-tonga ni huria i marparsaoran, marpanindangion dohot marpanghobasiaon.
Marhite sejarah na jempek on idaonta do na andul sumurung do hagogoon ni Debata sian nasa hagogoon dia pe i pamonanghon huriaNa rasirasa Darion. Patut do hita mangolophon Psalm 103:2 “puji ma Jahowa ale tondingku jala unang tung haluoahon denggan ni basaNa sudeNa” Amen.
II. Mula ni Huria di Pandan
1. Parmingguon na parjolo
Di taon 1970 lima keluarga ma na tardaftar ruas HKBP na marhuria tu HKBP Sibuluan, I ma:
TH. Silitonga
St. D. Panggabean
B.Siregar
St. M.Lumbangaol
M.Hutabarat
Ala dao tu HKBP Sibuluan mardalan pat jala hatihai ndang adong dope transportasi gabe jotjot ma ndang marminggu nasida. Di taon 1973 na lima keluarga on mangido ma tu parhalado sibuluan dohot pandita Ressort Tukka asa di patupa pos parmingguon di Pandan jala dioloi do pangidoan I di hatiha i. Ala ni i di mulai ma parmingguon di bagsaan ni amanta TH. Silitonga na niuluhon ni parhalado Ressort Tukka marganti-ganti jala ni dohotan ni sebagian ruas ni sibuluan na jumonok tu Pandan. Alai ndang sadia leleng haboratan angka masyarakat di patupa parmingguon di inganan i. Alani di pingkiri. ma muse mangalului inganan parmingguon tu inganan na asing.
2. Pajongjong Parmingguon Siputtol
Dung di patupa parmingguon di Pandan, gabe marroan ma angka na marugamo Kristen di luat on gabe pungu ma 18 KK. Dilului nasida ma muse inganan parmingguon. Ulaon i tulus marhite amanta F. Panggabean maminjamhon tanona di Muara Siputtol. Jala di pajongjong ma gareja i ukuran 6 x 8 m, maratap rumbia, tiang hau bulat dohot lante tano. Alai ndang sadia leleng di naso panagaman ro ma alogo na gogo si tutu na mangarumpakhon gereja parmingguon i.
3. Mangalului Inganan Hajongjongan ni Gareja
Godang do parungkilon na niadopan ni huria i, na ro sian duru, alai ndang biahaton nasida binahen ni i, lam tu sadana roha nasida laho mangalului inganan partapahan ni Gareja, sai masisungkunan ma nasida didia ma inganan na lumehet. Alani di taon 1975 marhite haputusan ni sinode HKBP Ressort Tukka na niuluhon ni Pdt. Hesekiel Sihombing, Pandita Ressort Tukka di sangkapi ma papindahon sabungan sian huta na bolon tu Pandan, jala marhite sangkap i sapandapot do sude parrapot laho manggadis tano partapahan di hutanabolon ( rumah Pdt. Ress&Biv)
Taon 1976, Pdt. Hesekiel Sihombing, Pandita Ressort Tukka manjumpangi kantor kapolsek Pandan M. Hutabarat Januari 1977. Laho pengamanann partapahan ni Gareja, ala hea di bongkar pargarejaan. Alani i di suru ma anggotana mangalului tano partapakan ima Amanta. Doloksaribu dohot amanta Manalu, ala di hatai di lapo barita i gabe jumpang ma dongan salapo amanta Nasution manggadis tano partapakan 100x105 m/( 125x105m). Dohot arga Rp. 150,000. Dung dapot partapakan i di donghon ma angka ruas na marragam Kristen na adong sekitar Pandan manghatai laho pajongjonghon Gereja parlapelapean dohot ukuran 7x10m, nasian hau hibul dingding dohot lantai papan, na maratap rumbia jala martombara ala di lokasi di rawa-rawa/ parbanjiran ima di parjabuan ni pandita Resst sinuaeng. Jala torop ni ruas ni Huria di tingki i 17 KK, na ro sian Huria Sibuluan dohot angka pangaranto na ro tu Pandan dohot na humaliang ima Pegawai Negeri, Polisi, Tentara, pengusaha na maringanan di Pandan. Ndungkon simpul pembangunan gereja i di ari jumat, 19 Agustus 1977 di sangkapi ma patupa pesta laho mangaresmihon ima na niuluhon ni Praeses Distrik IX Sibolga Pdt. B. Marpaung dohot Parhalado Pusat St. AH. Simorangkir. Ulaon i dipatupa ima: Ari Minggu 4 September 1977 ( Ari Kamis, 15 September 1997) di resmihon ma HKBP Pandan na niuluhon ni Praeses Distrik IX Sibolga Pdt. B. Marpaung jala laho manghobasi diangkat ma St. M. Sihombing na gabe wakil Guru Huria. Di undang ma Bupati Bangun Siregar, kepala kejaksaan Sibolga, dohot Kepala Pengadilan.
III. PANUTUP
Na ringkot situtu do sejarah ni huria, asa boi diparrohahon jala di paihutihut angka sundut na mangihut panggulmit ni Huria i gabe dohot nasida porsea di pangaramotion ni Debata di HuriaNa. Mansai ragam dope na laho sipasingkoponta di tongatonga ni Huria i, ala Huria i do gombaran ni panggulmiton ni ngolu ni Huria dohot parhaladoNa. Songoni ma rangrang ni sejarah Huria Pandan Kota Ressort Pandan na boi pinaandar dison, godang ma nauli na denggan na pinatupa ni Debata tu HuriaNa, jala ragam ma nang angka hamaolon na manosak HuriaNa i, alai ndang tarambat manang ise lomo ni roha ni Debata di tongatonga ni HuriaNa gabe pasupasu tu na humaliang. Tontu di bagasan ni ima ndang jojor dope sejarah on tarsurat Alani keterbatasan ni angka data na hurang singkop, Alani ringkot ma hita manambai huhut mengkoreksi angka naung hugurithon hami di son asa singkop tu tingki na ro.
Horas
